თავისუფალი უნივერსიტეტი
ENG GEO

Search form

მანჩო გიგანი

მანჩო გიგანი ჩინეთიდან

27.04.2018

ყველა ადამიანის ცხოვრებაში დგება მომენტი, როდესაც უნდა მივიღოთ გადაწყვეტილება და ავირჩიოთ გზა, რომელსაც ცხოვრების მანძილზე გავყვებით. ვეძებთ რაღაც სიახლეს, რაღაც ისეთს, რაც ჩვენთვის უცხოა და ღრმა შთაბეჭდილებებს ტოვებს.

როგორც ყველა ჩემს თანატოლს მსგავსი არჩევანის გაკეთება ოთხი წლის წინ მეც მომიწია, როდესაც თავისუფალი უნივერსიტეტის საერთაშორისო ურთიერთობათა სკოლაში ჩაბარება გადავწყვიტე. სწორედ აქ, საკმაოდ სპონტანურად მივიღე გადაწყვეტილება ამერჩია ჩინური ენა, შეიძლება ითქვას, რომ ბედი იყო, რადგან ამ გადაწყვეტილებამ შეცვალა ჩემი ცხოვრება.

მახსოვს პირველი იეროგლიფები და განცდა, როდესაც ყველასათვის უცხო და უცნაურ ენაზე წერას იწყებ, შემდეგ სიტყვებს წარმოთქვამ, შემდგომ კი ეს განცდა კიდევ უფრო ძლიერდება და გიჩნდება მოტივაცია. ჩვენი უნივერსიტეტის საერთაშორის ურთოეთობათა სკოლის ჩინურმა მიმართულებამ ეს ენა შემაყვარა და ვიტყვი, რომ ჩვენი ლექტორების დამსახურებაა, რომელთა ლექციებიც ყოველთვის ერთდროულად სახალისო და დატვირთული იყო. გარდა ამისა, ტარდებოდა უამრავი კონკურსი და ღონისძიება, ჩინური ახალი წელი, სიტყვით გამოსვლისა და პოეზიის კონკურსები. ორგანიზების პროცესში სტუდენტები მუდმივად ჩართულები ვიყავით, რაც სწავლის პროცესს კიდევ უფრო გვიხალისებდა. სწორედ თავისუფალ უნივერსიტეტში შევიტყვე, რომ შესაძლებლობა მქონდა მომეპოვებინა ჩინეთის სახელისუფლებო დაფინანსება და ჩინეთში გამეგრძელებინა სწავლა, ამან კიდევ უფრო შემმატა მოტივაცია. ჩემი მონდომების, ლექტორების თავდაუზოგავი შრომისა და მხარდაჭერის შედეგად ჩავაბარე ჩინური ენის მე-4 დონის გამოცდა და დაფინანსებაც მოვიპოვე. ამჟამად ჩინეთის ულამაზეს, მზიან და კუნძულოვან ქალაქ სიამენში ვაგრძელებ სწავლას, რისთვისაც ძალიან დიდი მადლობა მინდა გადავუხადო ჩვენ ლექტორებს, საერთაშორისო ურთიერთობათა სკოლის ჩინური ენის მიმართულების ხელმძღვანელსა და კონფუცის ინსტიტუტის დირექტორ მარინე ჯიბლაძეს, ჩვენს ლექტორებს ელი ელისაშვილსა და თამუნა ლომთაძეს, არ შემიძლია არ მოვიხსენიო ჩვენი უნივერსიტეტის რექტორი ბატონი ვახტანგ ლეჟავა, რომელიც მთელი ურთულესი პროცესის განმავლობაში ჩვენს გვერდით იყო, გვამხნევებდა და, რაღა თქმა უნდა, ჩინეთის საელჩოს წარმომადგენლებს.

ხშირად მეკითხებიან თუ როგორია ჩინეთში ცხოვრება? აქ ყველაფერს სხვა ელფერი აქვს. რა თქმა უნდა, ძალიან მენატრება ჩემი ქვეყანა, ოჯახი, მეგობრები, თუმცა ეს არის გამოცდილება, რომელიც ჩემი აზრით ყველა ადამიანმა უნდა მიიღოს.

სიამენი ჩინეთის სამხრეთით, ფუძიენის პროვინციაში მდებარეობს, ჩინეთის ერთ-ერთი მთავარი ეკონომიკური ზონაა, შესაბამისად ყველაფერი განვითარებულია. მახსოვს პირველი შთაბეჭდილებები, როდესაც თვითმფრინავიდან დავინახე ადგილი, სადაც შემდგომი ერთი წელი უნდა გამეტარებინა. აქ ყველაფერი განსხვავებულია, დილით მზე სხვანაირად ანათებს, სხვანაირად გვათბობს, მთელი ქალაქი მორთულია ულამაზესი ვარდისფერ ყვავილნარევი გამწვანებით, კუნძულებს შორის დამაკავშირებელი ხიდებით. ეს ქალაქი უკვე ჩემი სახლი გახდა, ამ ქალაქში სეირნობით არასოდეს დაიღლები. აქ ერთმანეთთან არაჩვეულებრივადაა შერწყმული ჩინური და დასავლური კულტურა, ულამაზესი არქიტექტურა, ვხვდებით ბუდისტურ თუ ტაოისტურ ტაძრებს, აქვეა პატარა კუნძული კულანიუ, რომელიც ჩინეთის ერთ-ერთ ყველაზე სუფთა ადგილად მიიჩნევა. კუნძულზე ავტომობილებს ვერ შეხვდებით, აქ მოსახვედრად კი ბორანით მოგიწევთ მგზავრობა, დანიშნულების ადგილზე მისული კი მიხვდებით, რომ მსოფლიოში ერთ-ერთ ყველაზე ლამაზ ქალაქში ხართ. ხშირად მეკითხებიან თუ რა მომწონს სიამენში ყველაზე მეტად. აქ ყველაფერი შესაძლებელია, თუ სულიერი სიმშვიდის მოპოვება გსურთ შეგიძლიათ ესტუმროთ ნანფუთუოს ტაძარს, რომელიც ჩინეთში ერთ-ერთ ყველაზე მნიშვნელოვან ძეგლს წარმოადგენთ, ისეირნოთ პარკებში, ზღვის სანაპიროზე და დატკბეთ ულამაზესი ხედებით. საქართველოში ახლა პოპულარულია ხელოვნება, მუსიკა, არტ ზონები და კაფეები, სიამენშიც არის ერთ-ერთი ჩემთვის უსაყვარლესი ადგილი, რომელსაც შაპოვეი ეწოდება, აქ მრავლად არის სუვენირების მაღაზიები, ქუჩის მხატვრობა, ვინილებისა და სიდი დისკების მაღაზიები, აქვე შეგიძლიათ დააგემოვნოთ უგემრიელესი კერძები სხვადასხვა ქვეყნიდან.

სიამენი განთქმულია ზღვის პროდუქტებით, ასე რომ მის მთავარ ქუჩაზე, ჭუნშანლუზე, ყოველ კუთხეში შეგიძლიათ დააგემოვნოთ სხვადასხვა დელიკატესები. ამ ქალაქმა უკვე დამიტოვა დუვიწყარი შთაბეჭდილებები და თავი შემაყვარა, რაც მხოლოდ ულამაზესი გარემოს დამსახურება არაა. აქაური ხალხი განსაკუთრებით სტუმართმოყვარეა, ხშირად ვხვდები გამვლელებს, რომლებიც მიღიმიან, მესაუბრებიან, ხშირად ვეხვევი სახალისო სიტუაციებში, რაც ჩემს ჩინურ ცხოვრებას უფრო საინტერესოს ხდის. დასვენების დღეებში ძალიან მარტივად შეგიძლიათ სხვადასხვა ქალაქებში მოგზაურობა, რადგან სწრაფი მატარებლები საკმაოდ კომფორტული და ხელმისაწვდომია, შესაბამისად ჩემს პროვინციაში უკვე მოვინახულე რამდენიმე ქალაქი, ჩინური ახალი წლის პერიოდში კი ძიანგსუს პროვინცია. რაც ყველაზე საინტერესოა, მოგზაურობისას ხვდები თუ რამდენად ფართო, მრავლისმომცველია ჩინური კულტურა, განსხვავება ხალხის ტრადიციებს, ჩვევებსა და საუბრის მანერას შორის.

როდესაც ჩინეთში ჩამოვედი უკვე საკმაოდ მესმოდა ჩინური ენა, რაც თავისუფალი უნივერსიტეტისა და ჩვენი ლექტორების დამსახურებაა, შესაბამისად არ გამჭირვებია გარემოსთან შეგუება და ხალხთან კონტაქტი. ამჟამად სიამენის ტექნოლოგიურ უნივერსიტეტში ჩინურ ენის კურსს გავდივარ, ჩვენს ჯგუფში სულ რვა სტუდენტი ვართ, მხოლოდ ორს შეგვიძლია ინგლისურად საუბარი, შესაბამისად უმეტესად ჩინურად ვსაუბრობთ. ლექციებით დატვირთული ვართ მეთქი ვერ ვიტყვი, თავისუფალი დრო ბევრი გვაქვს, თუმცა სამეცადინო ბევრია, ზოგჯერ ცოტათი რთულიც, ვამზადებთ პრეზენტაციებს, ვკითხულობთ გაზეთებს, ვსაუბრობთ კულტურულ განსხვავებებზე, ეკონომიკურ განვითარებაზე. შემიძლია ვთქვა რომ ნახევარ წელიწადშიც კი ჩემი ჩინური ენის დონე საგრძნობლად გაუმჯობესდა. უნივერსიტეტში უამრავი საინტერესო რამ ხდება, ესეების კონკურსები, სხვადასხვა ღონისძიებები, ექსკურსიები.

ჩემთვის ძალიან მნიშვნელოვანი და საამაყოა, რომ ესეების კონკურსის მესამე ადგილის მფლობელი გავხდი, ამასთანავე ვიყავი ახალი წლის ღონისძიების წამყვანი, რაც საკმაოდ რთული გამოწვევა და მნიშვნელოვანი გამოცდილება იყო, უნივერსიტეტის უცხო ენების ინსტიტუტის ყოველი სტუდენტი და ლექტორი მხარში მედგა, მამხნევებდნენ და მაძლევდნენ მოტივაციას, რამაც ვთვლი რომ შედეგი გამოიღო.
უკვე მეორე სემესტრიც დაიწყო, წინ კიდევ უამრავი საინტერესო რამ მელის.

წინაა HSK-ის მეხუთე დონის გამოცდა (რაც C1 დონეს უდრის) და ლექციები. უნივერსიტეტიდან ვგეგმავთ მოგზაურობას სიანსა და პეკინში და უამრავ სხვა ღონისძიებას.

წინ დატვირთული და საინტერესო სემესტრი მელის, საქართველოში დაბრუნებამდე კი იმედი მაქვს, რომ კიდევ უფრო მეტი წინსვლა მექნება. ცოტათი მიჭირს იმაზე ფიქრი, თუ როგორ დავტოვებ ჩინეთს, რადგან სიამენი ჩემი სახლია, ჩემი ოცნების ქალაქია, სადაც ყოველი დღე განსაკუთრებულად იწყება.

ნათია ხარხელი

ნათია ხარხელი ჩინეთიდან:

19.03.2018

წლების წინ ვერც კი წარმოვიდგენდი, თუ ოდესმე შორეულ აღმოსავლეთში ცხოვრების შესაძლებლობა მომეცემოდა, ახლა კი თითქმის ექვსი თვეა, რაც ჩინეთის ერთ-ერთ ყველაზე დიდ ქალაქში, თიენძინში, ნანქაის უნივერსიტეტში ვსწავლობ. თიენძინი არის მაგალითი სუფთა, კომფორტული ქალაქისა, სადაც უსასრულოდ შეგიძლია იხეტიალო და ყოველდღე აღმოაჩინო რაიმე ახალი. აქ სიმშვიდისა და თავისუფლების შეგრძნება არასდროს გეკარგება. არ აქვს მნიშვნელობა რისი ნახვა ან გაკეთება გინდა, თიენძინში იპოვნი ყველაფერს - თანამედროვე, შთამბეჭდავ არქიტექტურასაც და უძველეს ჩინურ ტაძრებსაც, შეგიძლია ერთ დღეს მდინარე ხაის სანაპიროს გაუყვე, დატკბე ულამაზესი ხედებით, ისეირნო იტალიურ უბანში ან ქალაქს თიენძინის სიმბოლოდ ქცეული ეშმაკის ბორბლიდან გადახედო, მეორე დღეს კი ნამდვილ ჩინურ სამყაროს გაეცნო, ისეირნო კულტურულ ქუჩაზე, დაათვალიერო ბუდისტური ტაძრები, დააგემოვნო ტრადიციული საჭმელი. თუ განტვირთვა გინდა, საღამოობით შეგიძლია ქუჩაში მოცეკვავე ჩინელებს შეუერთდე, არ აქვს მნიშვნელობა როგორ ცეკვავ, ამ ხალხის ენერგიულობა და სიცოცხლის სიყვარული მხოლოდ სასიამოვნო ემოციებს გიტოვებს.

ჩინეთში ცხოვრება უამრავ შესაძლებლობას იძლევა. პირველ რიგში, ეს არის იდეალური გარემო ენის შესასწავლად, რადგან ლექციები მხოლოდ ჩინურ ენაზე ტარდება და ადგილობრივებთან ურთიერთობაც ყოველდღიურად გიწევს. აქ ყოფნის პერიოდში შევხვდი სტუდენტებს მსოფლიოს ყველა კუთხიდან, ვისწავლე სხვისი კულტურის დაფასება და პატივისცემა, შევიძინე მეგობრები, რომლებთანაც უკვე უამრავი მოგონება მაკავშირებს. ჯერ-ჯერობით ნამყოფი ვარ ჩინეთის სამ ქალაქში. პირველი იყო პეკინი, რომელმაც თავი დამამახსოვრა ულამაზესი, უძველესი ღირსშესანიშნაობებითა და იმ ქაოსით, რომელსაც სხვაგან ვერსად იხილავთ. ჩინეთის დიდი კედელი, ზაფხულის სასახლე, აკრძალული ქალაქი - ეს იმ ადგილების მცირე ნაწილია, რომლებიც პეკინში ჩასვლისას აუცილებლად უნდა ნახო. ქალაქის ღირსშესანიშნაობებიდან ჩემთვის ფავორიტია „ცის ტაძარი“ - 天坛, რომელმაც ყველაზე დიდი აღფრთოვანება და დაუვიწყარი ემოციები დამიტოვა.

მეორე ქალაქია შანხაი - თამამად შემიძლია ვთქვა, რომ ეს არის ადგილი, სადაც ვისურვებდი მეცხოვრა. განვითარება, თანამედროვე ინფრასტრუქტურა, ცათამბჯენები - ეს ყველაფერი ამ ქალაქს ხელს არ უშლის, იყოს მყუდრო და თბილი იმდენად, რომ თოვლსა და წვიმაშიც არ დაგეზაროს გარეთ გასვლა. შანხაიში ღირს სიმაღლის შიშის დაძლევა. აქ შეგიძლია მსოფლიოში მეორე ყველაზე მაღალი შენობის „კენწეროდან“ გადახედო ქალაქს - ეს ემოციები ალბათ მთელი ცხოვრება გაგყვება თან.

თუკი გინდა ყინულის ზღაპარში აღმოჩნდე, ჩინეთში არც ესაა შეუძლებელი - ამის საშუალებას ქვეყნის ჩრდილოეთ ნაწილში მდებარე ქალაქი ხარპინი იძლევა. ყინულისა და თოვლის ფესტივალზე დასწრება ენით აღუწერელი ბედნიერებაა, თვითონ ქალაქი კი - ძალიან საყვარელი, პატარა და მყუდრო. არსად შემხვედრია ისეთი თბილი ხალხი, როგორიც ხარპინში. ამ ყველაფრის სანახავად ნამდვილად ღირს გაუძლო -20 გრადუს ყინვას, ოღონდ შემთხვევაში, თუ გაგიმართლა.

გარდა ამისა, ჩინეთში ცხოვრება გაძლევს საშუალებას იმოგზაურო ქვეყნის ფარგლებს გარეთაც. სწორედ ამის დამსახურება იყო ჩვენი, ქართველი სტუდენტების, მალაიზიასა და ტაილანდში მოგზაურობა, რომელიც სულ ახლახან დავასრულეთ.

ხანდახან ვფიქრობ, რომ ეს ყველაფერი სიზმარია. მადლიერი ვარ თავისუფალი უნივერსიტეტისა და ჩინური ენის ლექტორების, რომლებმაც უზრუნველყვეს ჩემი ჩინური ენის ცოდნის შესაბამისი დონე და მაქსიმუმი გააკეთეს, რათა ჩინეთში სწავლის შესაძლებლობა მქონოდა. არ შემიძლია აქვე არ აღვნიშნო ჩინეთის საელჩოს წვლილი, რომლის გარეშეც დღეს ამ ყველაფერს ვერ მოგიყვებოდით. იმედი მაქვს, ჩემი ჩინური ცხოვრება ისევე საინტერესოდ გაგრძელდება, როგორც აქამდე - დაუვიწყარი ერთი წლის დასრულებამდე კიდევ ოთხი თვეა დარჩენილი და შევეცდები, რომ ეს დრო ნაყოფიერად გამოვიყენო.

ნუნუ აბუაშვილი

ნუნუ აბუაშვილი ჩინეთიდან

22.02.2018

ნუნუ აბუაშვილი ჩინეთიდან:

2014 წელს ჩავაბარე თბილისის თავისუფალ უნივერსიტეტში, საერთაშორისო ურთიერთობების სკოლაში. მას შემდეგ ჩინური ენა ჩემი ცხოვრების განუყოფელ ნაწილად იქცა და ახლა, როდესაც ამ ბლოგს ჩინეთიდან ვწერ, კიდევ ერთხელ ვრწმუნდები ჩემი არჩევანის სისწორეში.
უკვე მეექვსე თვეა იმ სამყაროს ნაწილი ვარ, რომელსაც წიგნის ფურცლებიდან თუ სურათებიდან ვადევნებდი თვალს. ჩინეთში ძალიან სტუმართმოყვარე და ყურადღებიანი ხალხი ცხოვრობს, ამიტომ ამ დროის განმავლობაში არასდროს მიგრძვნია უცხოობის განცდა. პირველივე დღეებიდანვე აღმაფრთოვანებდა ქუჩაში მოსიარულე ადამიანების მზადყოფნა, დაგეხმარონ და იზრუნონ შენზე.
ქალაქს, სადაც მე ვსწავლობ, თიენძინი ჰქვია. ის, პეკინთან, შანხაისთან, გუანჭოუსა და ჩუნცინთან ერთად, არის ჩინეთის ცენტრალური დაქვემდებარების ქალაქების ჯგუფში. ეს ტერმინი ხელისუფლების მიერ გამოიყენება იმ დასახლებების აღსანიშნავად, რომლებიც ასრულებენ წამყვან როლს ქვეყნის პოლიტიკურ, ეკონომიკურ და კულტურულ განვითარებაში. თითოეულ ამ სფეროში მიღწეული წარმატება, ასევე თიენძინის განსაკუთრებული როლი საერთაშორისო ვაჭრობასა და ურთიერთობებში, აქ ყველგან იგრძნობა.
თიენძინის უნივერსიტეტი დაარსდა 1895 წელს და არის პირველი თანამედროვე უმაღლესი საგანმანათლებლო დაწესებულება ჩინეთში. ჩემი სასწავლო ცხრილი მოიცავს ჩინური ენის გრამატიკის, მოსმენის, მეტყველებისა და ლიტერატურის გაკვეთილებს. აქ განსაკუთრებულ მადლიერებას ვგრძნობ თავისუფალ უნივერსიტეტში ჩემი ქართველი თუ ჩინელი ლექტორებისადმი, რომელთა წვლილიც უზარმაზარია ჩემს თითოეულ წარმატებაში. ჩინელი მასწავლებლები ხშირად აღნიშნავენ, რომ ქართველი სტუდენტები სწორი ტონებითა და გრამატიკული ფორმებით მეტყველებენ, რაც, რა თქმა უნდა, სასიამოვნოა, რადგან აქ თითოეული ჩვენგანი საკუთარ სამშობლოს წარმოვადგენთ.
თიენძინში არის საუკეთესო გარემო ჩინური ენის დონის ასამაღლებლად, ასევე, ბევრი საშუალება განტვირთვისთვის და დროის სასიამოვნოდ გასატარებლად. შევიძინე ახალი მეგობრები და მივხვდი, თუ რამდენად საინტერესოა ურთიერთობა სხვადასხვა ქვეყნის წარმომადგენლებთან, რომელთაგანაც თითოეულს საკუთარი იდეები და ღირებულებები გააჩნია. მოვინახულე ჩინეთის სხვადასხვა ქალაქის ღირსშესანიშნაობები, ულამაზესი ზაფხულის სასახლე პეკინში, ჩინური ფლორენცია უცინში, უზარმაზარი ცათამბრჯენები შანხაიში, მსოფლიოს ფინანსური ცენტრი თიენძინში, ბუდისტური ტაძრები და ქრისტიანული ეკლესიები. გარდა ამისა, თვალს ვადევნებ ჩინეთის ურბანულ მოწყობას, ტურისტულ ცენტრებსა და ეკონომიკურ მიღწევებს. ქალაქში, რომლის მოსახლეობაც 15 მილიონს აჭარბებს, პატარა საქართველოს ამაყი წარმომადგენელი ვარ და გაცილებით უკეთ ვხედავ ჩემი სამშობლოს თითოეულ ნაკლსა თუ ღირსებას.

გიორგი გულიაშვილი

გიორგი გულიაშვილი ლონდონიდან

06.02.2018

Facebook-ი ყველა ქვეყანაში ერთ-ერთი წამყვანი და ლიდერი კომპანიაა, გამოირჩევა თავისი სამუშაო გარემოთი, თანამშრომლებისთვის სხვადასხვა ბენეფიტებით. მათთვის მნიშვნელოვანია კომპანიაში დასაქმებული ადამიანები კომფორტულად გრძნობდნენ თავს სამუშაო გარემოში. ამასთან, ლონდონიც ძალიან კარგი ქალაქია. მე ყველაზე მეტად ჩაინათაუნი მომეწონა, იმდენად რომ ლონდონში ყოფნის დროს, ქალაქის სხვა ნაწილში გასვლის სურვილიც კი არ გამჩენია. Brexit-ის მიუხედავად ტექნოლოგიური კომპანიებმა, Facebook, Google, Microsoft დაჩქარებულად ზრდა დაიწყეს UK-ში.

ჩემმა მეგობარმა, რომელიც ასევე Facebook-ში მუშაობს, ლონდონის ოფისის ვაკანსიების შესახებ შემატყობინა. ფეისბუქის ლონდონის ფილიალი სწორედ ჩაინათაუნთან ძალიან ახლოს მდებაორეობს. სანამ ამიყვანდნენ, ბევრი ინტერვიუ გავიარე. პირველად სატელეფონო გასაუბრება მქონდა მენეჯერთან, ამოწმებდნენ რამდენად მაინტერესებს კომპანიაში მუშაობა, შემდეგ იყო ტექნიკური ხასიათის გასაუბრებები, რამდენიმე ონლაინ ინტერვიუ და საბოლოოდ მთავარი შეხვედრა ლონდონში.

იქ უკვე შეამოწმეს, რამდენად ვჯდები მათი კომპანიის კულტურაში, ასევე შეაფასეს ჩემი ტექნიკური უნარები და გადაწყდა, რომ 16 აპრილიდან Facebook-ის ლონდონის ფილიალში Software Engineering-ის პოზიცაიზე ვიწყებ მუშაობას.

ოთხი კვირა ლონდონში და ორი კვირა HQ-ში გავივლი ტრენინგებს და ამის შემდეგა გადავწყვეტ რომელ განყოფილებას შევუერთდე.

ამის პარალელურად სხვა შემოთავაზებებიც მქონდა მადრიდიდან ( Source {d}) და პრაღიდან (Sizmek). ორივე ძალიან კარგი კომპანიაა, თუმცა ამ ეტაპზე Facebook-ით უფრო დავინტერესდი. ამ კომპანიაში უამრავი პროექტია, მეც ჯერ ჩამოყალიბებული არ მაქვს კარიერა როგორ განვავითარო და უფრო მრავალფეროვან გუნდთან მირჩევნია მუშაობა, რომელიც კვალიფიციურთან ერთად ძალიან მეგობრულია და მეხმარებიან, რომ ადვილად მოვერგო ლონდონურ რიტმს.

თამარ მენთეშაშვილი

თამარ მენთეშაშვილი კორეიდან

31.01.2018

რამდენიმე გასაზიარებელი გამოცდილება მათთვის, ვინც საკუთარი ულიმიტო შესაძლებლობების აღმოჩენის პროცესშია

2014 წელს დავამთავრე თავისუფალი უნივერსიტეტის სამართლის სკოლა. ამ უნივერსიტეტში გატარებული 4 წელი ნამდვილად განსაკუთრებით გამორჩეული, დატვირთული და საუკეთესო მოსამზადებელი ეტაპი იყო ჩემთვის. უნივერსიტეტის დამთავრების შემდეგ გავაგრძელე სწავლა დიდ ბრიტანეთში, რის შემდეგაც აზიაში, ჩინეთში გადმოვინაცვლე.

სხვადასხვა კულტურული ღირებულებებისა და ხასიათის მქონე ადამიანების გვერდზე მცირე ასაკიდან მუშაობამ და სწავლამ რამდენიმე მნიშვნელოვანი გარემოება დამანახა:
1. უნდა ვისწავლოთ, სიამოვნება მივიღოთ პროცესით და არ ვიყოთ მხოლოდ შედეგზე ორიენტირებულები. დღევანდელ რეალობაში ყველაფრის (მათ შორის, ჩვენი საკუთარი ბედნიერებისა და წარმატების) ხარისხის გაზომვას გვასწავლიან შედეგით. თუმცა, როცა ჩვევად იქცევ იმას, რომ მიუხედავად იმისა, "წარმატება", თუ "წარუმატებლობაა" შედეგი, შეგიძლია სიამოვნება მიიღო პროცესით, ხვდები რომ გაცილებით უფრო ბედნიერი და მოტივირებული ხარ პროცესში. შესაბამისად, შენი ეფექტიანობაც უფრო მაღალია, ვიდრე მათი, ვინც მუდმივად მხოლოდ შედეგს ელოდება. ეს გამოცდილება განსაკუთრებით ცხადი გახდა ჩემთვის მაშინ, როდესაც საკუთარი კომპანია შევქმენი ჩინეთში ჩამოსვლის შემდეგ და შევითავსე გუნდის ერთ-ერთი ლიდერის პოზიცია. ჩვენი გუნდი ცდილობს დღევანდელ რეალობაში ცვლილებების განხორციელებას ისეთი ინოვაციური ტექნოლოგიის გამოყენებით, როგორიც არის ბლოკჩეინი. ამ ძალიან ახალ და სწრაფად ცვალებად სფეროში თუ არ შეგიძლია საკუთარი და შენი გუნდის მუშაობის პროცესი გახადო სასიამოვნო, მაშინ თავად შედეგამდე მიახლოვებაც კი გამორიცხულია.

2. უნდა ვისწავლოთ მოსმენა. ეს ეხება როგორც სხვა ადამიანების, ასევე განსაკუთრებით საკუთარი თავის მოსმენის უნარს. სწორედ მოსმენის უნარმა და ინტერესიანობამ მომცა შესაძლებლობა, მიმეღო სწორი გადაწყვეტილებები იმასთან დაკავშირებით, თუ რომელი უნივერსიტეტი ამერჩია, რა ადამიანების გარემოცვაში ვყოფილიყავი, რა მიმართულებით წავსულიყავი და დავინტერესებულიყავი რადიკალურად განსხვავებული სფეროთი მაშინ, როდესაც ამ სფეროს ღირებულება ბევრისთვის ამოუცნობი და საეჭვოც კი იყო. დღეს ბლოკჩეინი უკვე აღიარებულია მრავალ სფეროში რევოლუციური ცვლილებების პოტენციალის მატარებელ ტექნოლოგიად. თუმცა ბევრს არ ემახსოვრება, რომ დღევანდელის საპირისპირო იყო რეალობა 4 წლის წინ.

3. უნდა ვისწავლოთ წარუმატებლობების ისეთივე ჩვეულებრივ და ყოველდღიურობის თანმდევ მოცემულობად მიღება, როგორიც მაგალითად წარმატებაა. ეს განაპირობებს თავის მხრივ 2 შედეგს: 1. მომზადებული ხვდები ნებისმიერ მარცხს, 2. არასდროს ხარ “ნამეტანი” უკმაყოფილო ან კმაყოფილი მიღწეული შედეგით და აგრძელებ ზრდას.

4. მნიშვნელოვანია, რომ არ დავუწესოთ საკუთარ თავს და არც სხვებს ლიმიტი შესაძლებლობებზე. ყოველთვის თუ იქნებით დადებითად განწყობილი ახალი გამოცდილებების მისაღებად, საკუთარ თავში ულიმიტო შესაძლებლობებს ნამდვილად ყველა აღმოაჩენს. სწორედ ამიტომ იყო ძალიან მნიშვნელოვანი თავისუფალი უნივერსიტეტი ჩემი და ალბათ ყველა იმ ადამიანის ცხოვრებაში, ვინც ეს სკოლა გაიარა. ამ გარემოში ნამდვილად გაქვს საშუალება, აღმოაჩინო საკუთარი უსაზღვრო პოტენციალი და ისწავლო გუნდში მუშაობა.

ეს რამდენიმე გამოცდილება პირადად ჩემთვის ცხოვრებაში სახელმძღვანელო აღმოჩნდა როგორც პროფესიულად, ასევე პიროვნულად.

დღეს ვარ დოქტორის ხარისხის კანდიდატი წამყვან უნივერსიტეტში. ვარ ბლოკჩეინ სექტორში საერთაშორიო კომპანიის თანადამფუძნებელი. ინოვაციური ტექნოლოგიების სფეროში, სადაც 95% მენეჯერული პოზიციებისა წარმოდგენილია საპირისპირო სქესით, ვარ კომპანიის საერთაშორისო სტრატეგიულ განვითარებაზე პასუხისმგებელი პირი. ვწერ არაერთი საერთაშორისო გამოცემისთვის, ვარ ბლოქჩეინ სფეროში რამდენიმე წარმატებული კომპანიის მრჩეველთა ბორდის წევრი, სამართლებრივი ჩარჩოს შექმნაში კონსულტაციას ვუწევ რამდენიმე სახელმწიფოს (მათ შორის, საქართველოში საჯარო რეესტრის ეროვნულ სააგენტოს). 2018 წელს დავსახელდი ბლოქჩეინ სივრცეში წამყვან მდედრობითი სქესის წარმომადგენლად, ვთანამშრომლობ სხვადასხვა ქვეყნის უნივერსიტეტებში არსებულ ბლოკჩეინ ლაბორატორიებთან როგორც ერთ-ერთი ასეთი საზოგადოების დამფუძნებელი და წარმომადგენელი. რაც ჩემთვის ყველაზე ღირებულია, საჯარო გამოსვლებითა თუ სხვა კომუნიკაციის არხებით ვცდილობ, რაც შეიძლება მეტი ახალგაზრდა ადამიანი დაინტერესდეს ინოვაციური ტექნოლოგიების სექტორით საქართველოში და მის ფარგლებს გარეთ. მე ჩემი მიზნების მიღწევის ჯერ კიდევ საწყის ეტაპზე ვარ და ვაგრძელებ ჩემზე ჭკვიანი და გამოცდილი ადამიანების ძიებას. ჩემი გამოცდილებით, მხოლოდ ასეთი ადამიანების საერთო ძალისხმევითაა შესაძლებელი იმ პოტენციალის სრული რეალიზაცია, რომელიც დღეს ინოვაციური ტექნოლოგიებისა და კერძოდ, ბლოკჩეინის მიღმა დგას.

გვერდები